كن شاعرا تكن أروش الناس

يمكن اتكلمنا في البلوبيف قبل كده لكن أنا لما قولت " الحب الحب .. البلوبيف البلوبيف " في عيد الحب أو الفلانتينو اللي فات كانت مقطع من شعر رومانسي لأخونا اللمبي الله يهديه .. لكن المشكلة ليست أن اللمبي لا يجيد كتابة الشعر .. لكن المشكلة تكمن في أنه لن يظبط التظابيط إلا لما يقول شعر و من النوع الرومانسي كمان .. فما حكاية الشعر؟؟
التأصيل الأصولي للشعر

عندما يعيش الفرد هائما نائما حائرا في بحار المشاعر و الخيالات و الأحلام و الأماني .. و أبراج المخ تبتدي تطير واحد ورا التاني .. و الأغاني عمالة تحشي في دماغتنا و قلوبنا .. مع ضغط العلاقات و تضارب الغايات و إختلاف المصائر .. نقابل الرجال و العيال و المصلحجية و الكرماء و البخلاء و الصديق و الخائن .. و بين كل هذا بنات أشكال و ألوان ما بين زميلة و صديقة و صاحبة و جدعة و أجدع من ميت راجل و حبوبة و هايمانة و تعبانة و سرحانة و دحيحة و متدينة و متحفظة و محافظة و هكذا ... بعد كل هذا يخرج الشعر من مزيج من المشاعر فهو فن صياغة المشاعر .. لكن زمان كان مش أي حد يقول شعر و كان أنواع الشعر كتير .. لكن دلوقتي كله بيقول شعر .. و كله في موضوع واحد .. الحـــــــــــــب؟؟؟
لو سيبتيني أعيش مكسور لو حبيتيني أكون مســرور
ولو أعدنــا جنب الســـور أنا قــــــــلبي يكون مطيور
أنا من غيرك زي الطـور وحتى بيكي مش مضرور

مش عارف الولاد و البنات ما يكتبوش ليه غير في الحـــــــب .. يكتبوا فيه حتى لو مش بيحبوا وتلافى كل شاعر مالي ودن البنت بتاعته - إن صح التعبير- بأشعار لا حصر لها و هيه آخر استمخاخ .. بل الأكتر من كده إن البنات تكتب أشعار للولاد .. و تعترف بكل مشاعرها .. ويقولوا بعد كده ده مجرد شعر عفيف شريف لطيف .. غير كده تلاقي واحدة عايزة تتعلم الشعر .. أهلا و سهلا .. حتتعلمه على إيد مين؟؟ أكيد على إيد زميلتها الشاعرة القديرة شيماء الشّعيرة .. لا طبعا لا سمح الله .. تتعلم الشعر على إيد بنت؟؟ .. مش ممكن .. لازم تتعلمه على إيد متخصصين أشعار و طبعا المتخصصين دول مش في دار المعارف و لا وزارة الثقافة و لا دكاترة كلية الآداب و لا حتى أحمد شوقي ذات نفسه .. يا ما أكتر المتخصصين في مدرج حقوق و سكاشن هندسة و سلالم آداب و جناين سياحة و مخابئ تجارة إنجليزي و معامل طب وكافيتيريات علوم ودهاليز المعاهد و أسوار الكورنيش و أشجار المنتزة ولو قولنا كل أماكن تواجد هؤلاء المتخصصين مش حنخلص .. وتلاقي شعر انجليزي عربي و عربي انجليزي .. وكل الحبيبة بيشعّروا .. و كل البنات بتصدق .. طبعا لو اتكلمنا في طرق تعليم هذه الموهبة حنلاقي طرق كتير .. منها طبعا أشكال التعليم اليدوي و يمكن ده أكتر اسلوب متبع .. كله بيوفر الوقت و بيعلم و يتعلم بإيده .. لكن قمة الهرتلة إن معظم الهايمانين الساهتانين دول ميعرفوش يعيشوا من غير مشاكل عاطفية .. شطة الحب يعني .. ليه؟؟ الله أعلم .. لكن لازم تتطلع من غنى لها و كتب خائنة و بائعه له بأرخص الأثمان .. و معظمهم يكتب في الظلم و الظلمات .. بعد قضاء أحلى الأوقات في الظلمات والتجاوزات .. و تلافيه يقول:
كنت محبا و أنت كارهة
كنت محقا و أنت ظالمة
كنت أمينا و أنت خائنة
كنت شاريا و أنت بائعة
تركت نفسي ففرمتيني
و صدقتك و كذبتيني
و ظبطتك و قلبتيني

واقع كلنا نعيشه لكن ندفن رؤوسنا غالبا كالنعام .. لكن الواقع يحتاج لحل مننا و من المسئولين
أنا عارف إن شباب كتير الشعر واقف في زوره و مش حيقدر يبلعه .. و بنات كتير بتقول
وبعدين ..
* هل يظل الناس عايشة في وادي و الحبيبة في وادي؟؟ أم أن الذنب لا يقع عليهم؟؟
* هل يستمر مسلسل الهيامان و السرحان ؟؟ أم أننا نفيق من الأوهام ؟؟
* هل سيكتب الشاعر الموهوب لزوجته أول قصيدة حب ؟؟ أم أن زوجته ستكون
محظوظة إن كانت قصيدتها هي الأولى بعد المائة العاشرة ؟؟
* هل سيطرة الحب و كل فروعه على أجهزة الإعلام هو السبب ؟؟ أم أن الشباب لا
يرون ما يستحق الشعر غير الحب ؟؟
* هل من يملأ إذن زميلته بشعر يشبع نفسه ؟؟ أم أنه الجري وراء السراب ؟؟
* هل يعد الشباب أنفسهم لمقابلة الحياة الخارجية العملية جديا ؟؟ أم أن اليأس جعلهم
يتمتعون بالعيش في الوهم ؟؟
* هل اماكن تعليم و تعلم الحب العملي .. قصدي الشعر العملي .. ستظل بلا أدنى
رقابة و خارج السيطرة ؟؟ أم أن المشاكل الأدبية خارج نطاق الخدمة ؟؟
* هل يحتاج الشباب للشعر و الحب و الهيام ؟؟ أم أنهم يحتاجون للعمل و الزواج وملئ
وقت الفراغ ؟؟
* ألم يحن الوقت لأن تنفق الدولة لمصلحة الشباب بدلا من الانفاق على الأمن
المركزي و أجهزة الأمن عديمة الفائدة ؟ أم أن الأمن و أجهزته أولى من استقرار
شباب هذه البلاد ؟

وأخيرا لكي زميلتي .. تقول جدتك الكريمة:"يا مآمنة للرجال .. يا مآمنة للمية في الغربال" .. وعجبي